അപൂർണ്ണമായ പുസ്തകതാളുകൾ
നളിനാക്ഷൻ ഇരട്ടപ്പുഴ
ആരും എഴുതി തീർക്കാത്ത
അപൂർണ്ണമായ പുസ്തകതാളിലേക്ക്
നിന്നെ കുറിച്ച് എഴുതപ്പെടുമ്പോൾ
മഷി നിറഞ്ഞു നിന്നിരുന്ന
പേന ശൂന്യമായിരുന്നു.
പൊടിപ്പും തൊങ്ങലും വെച്ച
വാക്കുകൾ കൊണ്ട്
മെനഞ്ഞെടുത്ത കഥകൾക്കൊപ്പം
എല്ലാം ഉൾവലിഞ്ഞു പോയിരുന്നു.
സ്നേഹത്തിലകപ്പെട്ട് തരളമായ്
പോവുന്ന സ്ത്രീ സമർപ്പണത്തെ
കഥകളായ് പരിവർത്തനം
ചെയ്യപ്പെടുമ്പോൾ
മരവിച്ച മനസുകൾക്ക്
പ്രതികാരത്തിന്റെ പകയായിരുന്നു.
പിഴച്ചതെന്ന് പഴിച്ചും,
പഴികൾ കേട്ട് തളർന്നും
മുടിഞ്ഞു പോയ ജന്മമെന്ന
കഥകൾ പ്രചരിക്കപ്പെട്ടിട്ടും
ഉള്ളിൽ നീറുന്ന തീ കെടുത്താൻ
കണ്ണിന്റെ ആഴങ്ങളിൽ നിന്ന്
ഒഴുകി വന്ന ആഴികൾ
ശ്രമിച്ചു കൊണ്ടേയിരുന്നു.
സ്നേഹ സമർപ്പണത്തിൻ
ഇരുൾ നിറഞ്ഞ വഴികളിൽ
അടിതെറ്റി പോവുന്നവരെ
കുറിച്ച് എഴുതപ്പെടാതെ
സ്വയം പിൻവലിഞ്ഞപ്പോൾ
കാലം മൗനത്തിന്റെ
കഥകൾ രചിക്കുന്നു.
No comments:
Post a Comment