ഇന്ത്യാ ഫെസ്റ്റ് – 2012 : ഒന്നാം സമ്മാനം നളിനാക്ഷന്‍ ഇരട്ടപ്പുഴക്ക്
അബുദാബി: അബുദാബിയിലെ ഇന്ത്യന്‍ സമൂഹത്തിന് മൂന്ന് ദിവസം ഉത്സവ രാവുകള്‍ സമ്മാനിച്ച് ഇന്ത്യാഫെസ്റ്റ് കൊടിയിറങ്ങി. സമാപന ദിവസം രാത്രി നടന്ന ഷെഹനായ് സംഗീതവും ഗുജറാത്തി നൃത്തവും ഭംഗ്ട നൃത്തവും മാജിക് ഷോയും ഈജിപ്ഷ്യന്‍ നൃത്തവും സന്ദര്‍ശകര്‍ക്ക് മറക്കാനാവാത്ത കലാവിരുന്നായി. അബുദാബി ഇന്ത്യന്‍ സോഷ്യല്‍ സെന്ററിന്റെ ചരിത്രത്തിലെ ഏറ്റവും വലിയ ജനക്കൂട്ടത്തെ ആകര്‍ഷിച്ചാണ് ഈ വര്‍ഷം ഇന്ത്യാഫെസ്റ്റിന് കൊടിയിറങ്ങിയത്. മൂന്ന് ദിവസങ്ങളിലായി 30,000ത്തോളം സന്ദര്‍ശകര്‍ ഫെസ്റ്റിന് എത്തിയതായി ഇന്ത്യാ സോഷ്യല്‍ സെന്റര്‍ പ്രസിഡന്റ് രമേഷ് വി. പണിക്കര്‍ പറഞ്ഞു. വന്‍ജനക്കൂട്ടത്തിന്റെ സാന്നിധ്യമുണ്ടായിട്ടും യാതൊരു പ്രശ്‌നങ്ങളുമില്ലാതെ ചിട്ടയായ സംവിധാനത്തിലൂടെ ഇന്ത്യാഫെസ്റ്റിനെ വന്‍ വിജയമാക്കാന്‍ സംഘാടകര്‍ക്ക് കഴിഞ്ഞതാണ് പ്രത്യേകത. വ്യാപാര മേളയില്‍ പങ്കെടുത്ത ബിസിനസ് സമൂഹവും ഭക്ഷണശാലകളും തട്ടുകടകളും ഒരുക്കിയ അമേച്വര്‍ സംഘടനകളും ഇന്ത്യാ ഫെസ്റ്റിന്റെ വിജയത്തില്‍ നിര്‍ണായക പങ്കുവഹിച്ചു. അബുദാബിയിലെ ഇന്ത്യന്‍ സമൂഹത്തിന് മാത്രം സാധ്യമാവുന്ന അംഗബലവും സംഘാടക മികവും ഇന്ത്യാ ഫെസ്റ്റിനെ ചരിത്ര വിജയമാക്കുകയായിരുന്നു. സമാപന സമ്മേളനത്തില്‍ പ്രസംഗിച്ച അതിഥികളും സ്‌പോണ്‍സര്‍മാരും ഇന്ത്യാ സോഷ്യല്‍ സെന്റര്‍ ഭാരവാഹികളെ മുക്തകണ്ഠം പ്രശംസിച്ചു.
ശനിയാഴ്ച രാത്രി 12ന് നടന്ന നറുക്കെടുപ്പില്‍ ഒന്നാം സമ്മാനമായ നിസ്സാന്‍ സണ്ണികാര്‍ അബുദാബിയിലെ സാമൂഹിക പ്രവര്‍ത്തകനായ നളിനാക്ഷന്‍ ഇരട്ടപ്പുഴയ്ക്കാണ് ലഭിച്ചത്. കൂടാതെ 50- ഓളം വിലപിടിപ്പുള്ള സമ്മാനങ്ങളും ഭാഗ്യവാന്മാര്‍ക്ക് ലഭിച്ചു.
സമാപന ചടങ്ങില്‍ ഇന്ത്യാ സോഷ്യല്‍ സെന്റര്‍ പ്രസിഡന്റ് രമേഷ് പണിക്കര്‍ അധ്യക്ഷനായി. യു.എ.ഇ.യിലെ ശ്രീലങ്കന്‍ അംബാസഡര്‍ ശരത് വിജെസിംഗെ, ഇന്ത്യാ സോഷ്യല്‍ സെന്റര്‍ വൈസ് ചെയര്‍മാനും എന്‍.എം.സി. ഗ്രൂപ്പിന്റെ സി.ഇ.ഒ.യും ആയ ഡോ. ബി.ആര്‍. ഷെട്ടി, ഇന്ത്യാ ഫെസ്റ്റിന്റെ മുഖ്യ പ്രായോജകരായ ജമിനി ബില്‍ഡിങ് മെറ്റീരിയല്‍സ് എം.ഡി. കെ.പി.ഗണേഷ് ബാബു, ഇന്ത്യന്‍ എംബസി സാംസ്‌കാരിക വിഭാഗം ഇന്‍ ചാര്‍ജ് അനൂജാ ചക്രവര്‍ത്തി, അല്‍മസൂദ് ഓട്ടോമൊബൈല്‍ അസി. ജനറല്‍ മാനേജര്‍ ഹുമയൂണ്‍ ആലം എന്നിവര്‍ ആശംസാ പ്രസംഗങ്ങള്‍ ചെയ്തു. ഇന്ത്യാ സോഷ്യല്‍ സെന്റര്‍ ജനറല്‍ സെക്രട്ടറി എം. അബ്ദുള്‍ സലാം സ്വാഗതവും ജനറല്‍ കണ്‍വീനര്‍ പി.എസ്. ജേക്കബ് നന്ദിയും പറഞ്ഞു.
