നാരങ്ങ മിഠായി

നാരങ്ങ മിഠായി

         നളിനാക്ഷൻ ഇരട്ടപ്പുഴ 

ഓർമകളിൽ നിന്ന് 

പുഞ്ചിരി തൂകി 

മധുരം നുണഞ്ഞു 

മാടി വിളിക്കുന്നു 

നാരങ്ങ മിഠായി.

സമ്മതമില്ലാതെ 

അച്ഛന്റെ കീശയിൽ നിന്ന് 

തട്ടിയെടുത്ത 

പത്തു പൈസ തുട്ടും, 

മോഷണ ശ്രമം 

അറിഞ്ഞാലുള്ള 

ചൂരൽ കഷായത്തിന്റെ 

തീ പാറും വേദനയുടെ 

നിമിഷങ്ങളും കടന്നു 

ഭരണിയിൽ 

നിന്നെന്നെ നോക്കി 

കുണുങ്ങി ചിരിക്കുന്നു 

നാരങ്ങ മിഠായി.

പത്തു പൈസക്ക് 

രണ്ടെണ്ണമെന്നു കരുതി 

മഞ്ഞയും ചുവപ്പും  

നിറത്തിൽ പത്തെണ്ണം 

ഒളിപ്പിക്ക വയ്യാതെന്നെ 

കരയിച്ച നാരങ്ങ മിഠായി

നിനക്ക് മധുരത്തേക്കാളേറെ 

കയ്പായിരുന്നോ അന്ന്.

അധികാര ബിംബം

അധികാര ബിംബം 

          നളിനാക്ഷൻ ഇരട്ടപ്പുഴ 

രാത്രിയുടെ ഇരുളാഴങ്ങളിൽ 

അപരിചിതമായ ഭാഷയിൽ 

ഹൃദയ താളത്തിനു വേഗം 

കൂട്ടികൊണ്ടു 

ഭയാനകമായ വെളിപ്പെടുത്തലാൽ  

ഭയചികിതരാക്കുന്നു നമ്മെ.

കാട്ടാള രോദനത്തിൻ 

അതിഭീകരമായ പ്രകമ്പനവും 

അതെ തുടർന്നുള്ള നിശബ്ദതയും 

ഭീതി പരത്തി വാൾമുനയിൽ 

കുത്തി നിറുത്തുകയാണ് നമ്മെ.

ഊറ്റി ഉരുക്കി 

കരുതലായ് വെച്ചതെല്ലാം 

കടലാസ്സിൻ വില പ്രഖ്യാപിക്കുന്ന 

ദുർഭൂതങ്ങൾ.

പിശാചുക്കളേക്കാൾ പേടി 

പെടുത്തും വിധം 

പുതിയ പുതിയ 

പ്രഖ്യാപനങ്ങളെ കുറിച്ച് 

ആവലാതിയുടെ വേവലാതിയിൽ 

ഉരുകി തീരുന്ന നമ്മൾ.

ഇന്ന് 

തലയ്ക്ക് മീതെ നൂതന നിയമത്തിന്റെ 

വാളുകൾ തൂക്കി കഴുകൻ കണ്ണുമായ് 

അധികാര ബിംബങ്ങളുടെ 

നിരീക്ഷണത്തിലാണ് നമ്മൾ.

പിന്നെ പിന്നെ ഇതെല്ലം 

സ്വന്തം അസ്ഥിത്വത്തിലേക്ക് 

സ്വകാര്യത നഷ്ടപ്പെടും വിധം 

അധികാര ഭീകരതയുടെ 

കടന്നു കയറ്റമെന്നു 

തിരിച്ചറിയുന്നു നാം.

സ്മൃതിനാശം

സ്മൃതിനാശം 

          നളിനാക്ഷൻ ഇരട്ടപ്പുഴ 

വാക്കുകളെന്നും മുതൽക്കൂട്ടെന്ന് 

ഓതി തരുമെന്നച്ഛൻ 

നിത്യവും 

ഒരു വാക്കെന്ന
ഉപദേശ പെരുമഴയാലച്ഛൻ 

വാക്കിന്റെ മൂർച്ചയും 

വാക്കിന്റെ ഈണവും 

വാക്കിന്റെ താളവും 

സമന്വയിച്ചതാണച്ഛൻ. 

ഘോരമായ വാക് ധോരണികൾ 

ഘോരമായ വാക് ശരങ്ങളിൽ 

നിറഞ്ഞു തുള്ളിയ കാലം.

കാലക്രമത്തിൽ വാക്കുകൾ 

പൊടിപിടിച്ച മാറാല പോലെ 

ഓർമ്മകൾക്കു ശൂന്യതയുടെ 

ക്ലാവ് പിടിച്ചു.

എല്ലാം വെട്ടിപ്പിടിക്കാൻ 

കാണിച്ച കൂർമ്മത 

തകർന്നടിഞ്ഞു   

കൊള്ളിമീൻ കണക്കെ.

പിന്നെ പിന്നെ വാക്കുകളും,

വാക്യങ്ങളും,  ക്രമേണ 

ഞാനും കുടുംബവും 

ഏതേതെന്നറിയാത്ത വിധം 

അകവും പുറവും ബോധമില്ലാത്ത 

കഠിന ദുര്യോഗത്തിൽ 

ഓർമ്മയ്ക്ക്  മറവിയുടെ 

കരിമ്പടത്തിന്റെ പുതപ്പ്‌ വീണു.

ഏകാന്തത

ഏകാന്തത 

നളിനാക്ഷൻ ഇരട്ടപ്പുഴ 

ഏകാന്തതയുടെ കാട്ടിൽ 

ചുറ്റും മൗനത്തിന്റെ കടലിൽ 

ഒരു കൊച്ചു ദ്വീപായ്‌ ചുരുങ്ങിയ 

പഥികയാണവൾ.

ഇന്നിനെ നോക്കി ചിരിക്കുന്ന തിരകൾക്ക് 

നാളെയെ കുറിച്ചുള്ള ഭീതിയേതുമില്ല 

ഒരിക്കലന്നു കടൽക്കരെ 

തിരയെടുത്ത പകുത്ത തീരവും 

ഹുങ്കാരഭാവത്തോടെ 

കാറ്റ് താണ്ഡവമാടി 

ഭയന്നലർന്ന വേളയും 

തിരകൾക്കിടയിൽ 

കഴിഞ്ഞകാലത്തിന്റെ 

കാലടികൾ മായാതെ കിടപ്പുണ്ട്.

പാറക്കമുറ്റിയോർ, പറന്നകന്നവർ 

 പലതുമോർമ്മയിൽ 

മരിച്ചടിഞ്ഞു പോയത് 

സ്വപ്നവും മഴവില്ലുമൊക്കെയായ് 

ഏകാന്തതയുടെ കാട് 

മറവിലേക്ക്‌ ആഴ്ന്നു പോവുന്നു 

ഈ നിശബ്ദ തീരത്തിൽ.

സ്നേഹം

സ്നേഹം 

             നളിനാക്ഷൻ ഇരട്ടപ്പുഴ 

നിന്നിൽ നിന്നുള്ള 

നന്മ തുളുമ്പുന്ന 

പ്രതീക്ഷയുടെ കിരണമാണ് 

സ്നേഹം.

ആഗ്രഹിക്കുമ്പോൾ 

ലഭിക്കാത്തതും 

ആവശ്യപ്പെടുമ്പോൾ 

നല്കപ്പെടുന്നതുമല്ലലോ 

സ്നേഹം. 

ഹൃദയത്തിൽ നിന്ന് 

ഹൃദയത്തിലേക്കുള്ള 

അകലം കുറക്കലല്ലേ 

സ്നേഹം.

ജ്വല്പനങ്ങളിൽ നിന്ന് 

യാഥാർഥ്യത്തിലേക്കുള്ള 

നാഴികയുടെ അകലമാണ് 

സ്നേഹം.

മറ്റുള്ളവർക്ക് നൽകേണ്ടതും 

സ്വന്തമായി ഉണ്ടാവേണ്ടതും 

അടിച്ചേൽപ്പിച്ചു നൽകേണ്ടാത്തതും 

ഇന്ന് സ്വന്തമായില്ലാത്തതുമല്ലേ 

സ്നേഹം.

ഖർബാൻ

ഖർബാൻ 

    നളിനാക്ഷൻ ഇരട്ടപ്പുഴ 

പടച്ചു വെച്ച
പല കഥകളും 
പറഞ്ഞു ഫലിപ്പിക്കാൻ
പല കിങ്കരന്മാരും
നമ്മുക്ക് ചുറ്റും
വലയം ചെയ്യും.
പല വർണ്ണങ്ങളിൽ
വിരിഞ്ഞ പൂക്കൾ
തേൻ നുകരാനുള്ള
ശലഭത്തെ
ആകർഷിക്കും പോലെ
നമ്മെ കീഴ്‌പ്പെടുത്തും.
വിഷലിപ്തമായി
നാം നുകർന്നതു
മധുവെന്ന് പറഞ്ഞു
നമ്മെ ധരിപ്പിക്കും.
പീഡനത്തിരയാവുന്ന
കുഞ്ഞുപൈതങ്ങളുടെ
നിലവിളിയെ
ഹൃദയ സംഗീതമെന്നും
പട്ടിണി കിടന്നു
ശോഷിച്ച കോലത്തെ
ഡയറ്റിങ്ങെന്ന്
പറഞ്ഞു ഫലിപ്പിക്കാൻ
ശ്രമിച്ചു കൊണ്ടേയിരിക്കും.
 ഉരുണ്ട ഭൂമിയെ
പരന്ന ഭൂമിയെന്നും പറഞ്ഞു
ആത്മാവിന്റെ നിയന്ത്രണം
ഖർബാനാക്കുന്നു നമ്മിൽ ...

പ്രണയം

പ്രണയം 

         നളിനാക്ഷൻ ഇരട്ടപ്പുഴ 

പേരറിയാത്ത നൊമ്പരത്തിന്റെ 

ഒരു നോവായ് മനസ്സിൽ 

എന്നും ഒരു നനുത്ത ഓർമ്മയായ്‌ 

കടന്നു വന്നതാണ് പ്രണയം.

ഞാനെന്നെ അറിയുന്നതിനെക്കാൾ 

നിന്നെ അറിയുന്നുവെന്ന് 

നടിക്കുന്നതാണ് പ്രണയം.

മിന്നിയും മങ്ങിയും 

വീണ്ടും ജ്വലിക്കുന്ന 

മിന്നാമിനുങ്ങായ്  പ്രണയം.

മഴയായ് പെയ്തും 

കനലായ് എരിഞ്ഞും 

തണലായ്‌ പടർന്നതും പ്രണയം.

മോഹസ്വപ്നങ്ങൾ രചിച്ചും 

നിറമുള്ള പൂക്കൾ വിരിയിച്ചും 

കിരണങ്ങളില്ലാത്ത സ്ഫുരണമായ് തീരുന്ന 

മുറിവുകളുടെ വസന്തമാണ് പ്രണയം.

നിറഭേദങ്ങൾ

നിറഭേദങ്ങൾ 

            നളിനാക്ഷൻ ഇരട്ടപ്പുഴ 

'അമ്മ എനിക്കായ് 

പകർന്നു നൽകിയ 

ഹൃദയത്തിൽ 

പൊതിഞ്ഞ സ്നേഹലാളനത്തിന് 

നിറഭേദങ്ങളേതുമേയുണ്ടായിരുന്നില്ല.

അച്ഛനദ്ധ്വാനത്തിൻ വിയർപ്പിൽ 

ഒരുംകൂട്ടിയ അന്നത്തിന് 

വർണ്ണങ്ങളേതുമേയുണ്ടായിരുന്നില്ല.

ജന്മനാലെന്നിൽ ഊട്ടിയുറപ്പിച്ച 

വിശ്വാസത്തിൽ കലർപ്പുകലർന്നൊരു 

ബാഹ്യ വിലക്കുകളേതുമേയുണ്ടായിരുന്നില്ല.

പിന്നെ, പിന്നെ,  

സ്നേഹലാളനങ്ങൾക്കു 

കൃത്രിമ രൂപവും ഭാവവും 

കണ്ടു തുടങ്ങി.

പട്ടിണി മാറ്റുന്ന അന്നപാനങ്ങൾ

നാടും നാട്ടാരും തീരുമാനിക്കും

വിധത്തിൽ കാലമാകെ 

മാറ്റി മാറിച്ചു.

ഒടുവിൽ 

കണ്ടതും കേട്ടതുമായെൻ 

വിശ്വാസത്തിൻ 

അടിത്തറ തകർത്തെറിഞ്ഞ 

മൂഢമാമൊരു 

പുത്തൻ വിശ്വാസവും'.

കവിത

കവിത

         നളിനാക്ഷൻ ഇരട്ടപ്പുഴ

നഷ്ട സ്വപ്നങ്ങളുടെ 

വേദനയിൽ നിന്നു ഞാൻ 

കോർത്തിണക്കിയ

അക്ഷരമണികളാണെൻ  

കവിത.

സ്നേഹത്തിൻ നിറ 

സൌരഭ്യം  പടർത്തും  

അക്ഷര വർണ്ണ പൂക്കളാൽ 

കോർത്തിണക്കിയതാണെൻ  

കവിത. 

പീഡിത ഹൃദയങ്ങൾക്ക്‌ 

സാന്ത്വനമേകും, 

മർദ്ദിത ജനങ്ങൾക്ക് 

തണലായി നില്ക്കും 

ഒരു മരമാണെൻ  

കവിത. 

മതവും മനുഷ്യനും 

പരസ്പരം കലഹിച്ചിടുമ്പോൾ 

മനമോടെ മനതാരിൽ 

സ്നേഹം വിളയിക്കുമാണെൻ
കവിത.  

കുട - നളിനാക്ഷൻ ഇരട്ടപ്പുഴ

എന്നും 

ഒരു തണലായ്‌ 

എനിക്കൊരു കുടയുണ്ട്.

ദുരിതം വിതക്കും

പെരുമഴയിലെനിക്ക് 

ഒരു തുണയായ്‌ 

എനിക്കൊരു കുടയുണ്ട്.

ദിശ തെറ്റി വരുന്ന 

കാറ്റിലും കോളിലും 

ഒരു തടയായ്‌ 

എനിക്കൊരു കുടയുണ്ട്.

വറുതിയിൽ തിരിയും 

പെരുവയറിനെ 

ഒരു മറയാക്കാൻ 

എനിക്കൊരു കുടയുണ്ട്.

എല്ലാ

സുഖ ദുഃഖങ്ങളിലും 

എന്നും നിഴൽ പോൽ  

ഇണയായെനിക്കൊരു കുടയുണ്ട്.

വിഷമവൃത്തം - നളിനാക്ഷൻ ഇരട്ടപ്പുഴ

ഇരയെ പിടിക്കാൻ 

ചെറുമീനിനെ കൊളുത്തി 

വാ പിളർന്ന 

ഒരു ചൂണ്ടയുണ്ട് പിറകിൽ...

തെളി നീരിൽ വിഷം ചേർത്ത് 

കുടി നീരിൽ മായം ചേർത്ത് 

ഭീതിയുടെ കരിമ്പടം വിരിച്ചു 

ഒരു വലവീശുകാരനുണ്ട് പിറകിൽ... 

യുവ മനസ്സിൽ മോഹത്തിൻ 

മദഗന്ധ പൂക്കൾ വിരിയിച്ച്  

അത്ഭുതം സൃഷ്ടിക്കും 

മാജിക്കുകാരനുണ്ട് പിറകിൽ...

അരുതെന്ന് പറഞ്ഞും 

അരുതായ്മ ചെയ്തും 

ചെറുതായി പോവുന്ന 

ലോകത്തിലാണ് നമ്മൾ...

പറയുന്ന വാക്കിന്റെ 

പതിര് തിരിയാതെ 

നട്ടം തിരിയുന്ന 

തലമുറയിലാണ് നമ്മൾ...

മനസാക്ഷിയില്ലാത്ത 

ഹൃദയവും പേറി

നേരിനെ കാണാതെ  

തിമിരവും ബാധിച്ച് 

തപ്പി തടയുന്നു മർത്ത്യർ ... 

സൌമ്യവും സ്വച്ഛവുമായ ജി.കെ. - നളിനാക്ഷൻ ഇരട്ടപ്പുഴ

സൌമ്യവും സ്വച്ഛവുമായ ജി.കെ. - നളിനാക്ഷൻ ഇരട്ടപ്പുഴ 

പതിറ്റാണ്ടുകളായി കേരള രാഷ്ട്രീയത്തിൽ ശ്രദ്ധേയമായ മുന്നേറ്റം നടത്തിയ  ജി.കെ യുടെ വേർപാട്  അക്ഷരാർത്ഥത്തിൽ സംസ്ഥാന രാഷ്ട്രീയത്തിലും പൊതു രംഗത്തും കനത്ത നഷ്ടമാണ്. മതേതരവാദി, സംശുദ്ധ രാഷ്ട്രീയക്കാരൻ, കറകളഞ്ഞ ജനാധിപത്യ വാദി അങ്ങനെ വിശേഷണങ്ങൾ ഒരുപാട്  പറയുവാനുണ്ട് ജി.കെ. എന്ന പ്രിയ സഹോദരനെ കുറിച്ച്.

തിരുത്തൽവാദ രൂപീകരണ സമയത്താണ് ഞാൻ ജി.കെ. യുമായി അടുപ്പം തുടങ്ങിയത്. തിരുത്തൽവാദം എന്ന ആശയം ജി.കെ.യും, ചെന്നിത്തലയും, ഷാനവാസും ഉൾപെട്ട ത്രിമൂർത്തികൾ  മുന്നോട്ട്  വെച്ചപ്പോൾ അന്ന് കെ.എസ്.യു. പ്രവർത്തകനായിരുന്ന ഞാൻ പിന്തുണ പ്രഖ്യാപിച്ച്‌  ഒരു പ്രസ്താവന ഇറക്കുകയുണ്ടായി. അതിനെ തുടർന്ന് എനിക്ക് അദേഹത്തിന്റെ ഒരു കത്ത് വന്നു. അതിൽ അദേഹം ഇങ്ങനെ എഴുതി "സമാനചിന്താഗതിക്കാർ ഒന്നിക്കാൻ സമയമായി" എന്ന വാചകം. അതിന്  ശേഷമാണ്  കെ.എസ്.യു. ജില്ലാ കമ്മറ്റി വിദ്യാർഥി കോർണറിൽ ഒരു പൊതുപരിപാടി സംഘടിപിക്കുന്നതും.

രമേശ്‌ ചെന്നിത്തലയും മറ്റും ദൽഹി രാഷ്ട്രീയവുമായി ബന്ധപെട്ട് പോയെങ്കിലും അന്ന് മുതൽ ഇന്ന് വരെ ഒരനിയനെ പോലെ ആ ബന്ധം തുടരാൻ അദേഹം ശ്രമിച്ചിരുന്നു. മാസത്തിൽ ഒരു തവണയെങ്കിലും ഞങ്ങൾ വിളിക്കുമായിരുന്നു. എന്റെ വിളി കണ്ടില്ലെങ്കിൽ എന്നെ ഇങ്ങോട്ട് വിളിക്കുമായിരുന്നു, ഞാൻ ഓരോ തവണ നാട്ടിൽ വരുമ്പോഴും എന്നെ കാണാൻ വീട്ടിൽ വരിക പതിവായിരുന്നു. പലപ്പോഴും എന്നോട് നാട്ടിലേക്ക് തിരിച്ച്  വരുവാനും, പാർട്ടിയിൽ എന്നെ പോലെയുള്ളവർക്ക് ഒരു സ്പേസ് ഉണ്ട് എന്ന് എന്നെ ഓർമ്മപെടുത്തുകയും ചെയ്യുമായിരുന്നു.

മരണം നിശ്ചയമാണ് എന്നറിയുമ്പോഴും ഇഷ്ടപ്പെട്ടവരുടെയും വേണ്ടപ്പെട്ടവരുടെയും മരണം നമ്മെ വല്ലാതെ ദുഃഖത്തിലാഴ്ത്താറുണ്ട്. ജി.കെ എന്ന ആ മനുഷ്യ സ്നേഹിയുടെ പെട്ടെന്നുള്ള മരണം എന്നെ വല്ലാതെ നൊമ്പരപ്പെടുത്തുന്നു.

രാഷ്ട്രീയത്തിലും വ്യക്തി ജീവിതത്തിലും മാന്യതയും മനുഷ്യത്വവും പുലർത്തിയ  കോണ്‍ഗ്രസ്സിലെ വേറിട്ട മുഖമായിരുന്നു ജി.കെ. രാഷ്ട്രീയക്കാരനായാലും, നിയമസഭാംഗമായാലും, മന്ത്രിയായാലും, സ്പീക്കറായാലും  എല്ലാറ്റിലും അദേഹത്തിന്റെതായ ഒരു ശൈലിയുണ്ട്. ഭരണപക്ഷത്തായാലും പ്രതിപക്ഷത്തായാലും ഒരു ഉറച്ച പോരാളിയായി നിലകൊണ്ടപ്പോഴും മാന്യത വിട്ടു പെരുമാറിയിട്ടില്ല എന്നത് അദേഹത്തെ മറ്റുള്ളവരിൽ നിന്ന് വ്യത്യസ്തനാക്കുന്നു. പുറമേ പരുക്കനാണെന്ന് തോന്നുമ്പോഴും മൃദുലമായിരുന്നു ആ മനസ്സ്. സൌമ്യവും സ്വച്ഛവുമായ സാമീപ്യമായിരുന്നു അദേഹം എപ്പോഴും.

സാഹിത്യത്തോടും സിനിമയോടുമുള്ള കമ്പം എന്നും മനസ്സിൽ സൂക്ഷിച്ചിരുന്ന അദേഹത്തിന് കലാകാരന്മാരും എഴുത്തുകാരും സ്വന്തക്കാർ തന്നെയായിരുന്നു. അക്ഷരങ്ങളോടും അഭ്രപളികളോടുമുള്ള ബന്ധം പോലെ സാഹിത്യകാരന്മാരോടും കലകാരന്മാരോടുമുള്ള ബന്ധവും സൌഹൃദവും എന്നും അദേഹം കാത്തു സൂക്ഷിച്ചിരുന്നു.

 2011ൽ ഉമ്മൻചാണ്ടി മന്ത്രിസഭയിൽ അദേഹത്തിന്റെ പേര് പരിഗണിക്കാതെ വന്നപ്പോൾ പറഞ്ഞ വാക്കുകൾ ഞാൻ ഇപ്പോഴും ഓർക്കുന്നു. "പാർട്ടിയിൽ ഞാൻ ഇത്രയൊക്കെ ആയില്ലടെ? പിന്നെ അവർ തരണമെങ്കിൽ തരട്ടെ."  എങ്കിലും കെ.പി.സി.സി. അധ്യക്ഷ്നാവുക എന്ന തന്റെ അതിരറ്റ മോഹം ബാക്കിയാക്കിയാണ് ഒരില പോലും ഇനക്കാതെ ജി.കെ. യാത്രയായത്.

ആകാശത്തിന്റെ അഗാധതയിലും സമുദ്രത്തിന്റെ സാന്ദ്രതയിലും ഞങ്ങൾ താങ്കളെ ഓർത്ത്  കേഴുന്നു. വേർപാട് ഒരു വിലാപമായി, ഒരു നേർത്തമൂളലായി, ഒരു തേങ്ങലായി ഉയരുന്നു. ഇനി നമ്മുടെയിടയിൽ ഒരു ജി.കെ. ഉണ്ടാവുമെന്നറിയില്ല എങ്കിലും കാലം ആവശ്യപെടുന്നു പൊതു രംഗത്ത് ഇനിയും ഒരു പാട് ജി.കെ.മാരെ. 

                        *******************

വ്യഥ - നളിനാക്ഷൻ ഇരട്ടപ്പുഴ

നാടിൻറെ മണവും

നാടിൻറെ മോടിയും 

നാടിൻറെ പ്രൌഡിയും

വാടി തളർന്നില്ലാതായി... 

നാളത്തെ കരുതലായ്‌ 

കുത്തി മുളപ്പിച്ച 

പുതു നാമ്പുകളോരോന്നും 

കത്തി കരിഞ്ഞില്ലാതായി... 

ദാഹം ശമിപ്പാനായ് 

കെട്ടി പടുത്ത 

കിണറും കുളവും 

വറ്റി വരണ്ടില്ലാതായി... 

ഹിതമല്ല കർമത്തിൻ 

പ്രതിലോമ  രൂപം  

നാടിൻ ഹരിതാഭ 

തല്ലി തകർത്തില്ലാതാക്കി....